Siyin Concert Thuhilhna

PATHIAN MAIPHA  A ZONG MINAM

[Matthew 6:33]

“Pathian Ngam le ama dikna [thutang] zong masa vun! Na zong uh le, tua na theampo a hong pia thua tu hi” [Matthew 6:33,Cope]  

PATHIAN MAIPHA AZONG MINAM

1.     Ii thulu “Pathian Maipha Azong Minam” ateal, ii lampuite thiam ka sa hi.  TOPA Jesus ii hong thupiak, Sizangte na eima aituam sua zo ii hikom lungdamhuai mama hi.  

2.     Ahitazong ii zon tu sia, bang tak ziam? Pathian maipha ziam maw, Pathian ukna-ngam ziam maw,  topate Topa, kumpite Kumpi ahi a ngam-uk Pa, Pa PT ziam maw ngaisut huai ka sa hi.    

3.     Khamtung ngam ah Christian suak masa ii Pute en leang, ii pute na PT na zong hi ngawl a, PT in Abraham a sam bangin hong sam sak ci in ka ngaisun hi.  15 March 1899 ni’n sangmang Carson Haka a thet hun le, Sizangkual ah Pu Pau Suan ii Phungkhawm tu a na hanciam san hun kisi hi.  Ngeina pha ngawlte nusia in Saya Shwe Zan hong thet ciang kizom thei pai hi.  Pu Thuam Hang in Doai-biakna tungah ngualzawna a nga ciang “Doai awng, banghang kei hong theam ni ziam?” ci thei in Christian na pom thei pai hi.     

4.     Khuasak ah Saya Shwe Zan hong thet ma Haka [1900] le Tedim [1902] Laisin Sang na nei zo hikale sang patang zong nga zo meal ngawl a, Khuasak pan Christian kisuak masa ci sia lamdang hong kisa mama hi.  PT hong teal maksak, hong zonh maksak hunlam mihingte in telzo ngawl hi.  

5.     TOPA in Sizang Minamte miimcii teal, taangcii teal in hong teal a, hong zonh sia Israelte a teal bangin a ngam a lei pungsak, beaksak tu, khuavak taangsak tu in hong dei ahi hi.  Zolei bek hingawl, Kawlngam, Vai ngam le leimong dongin TOPA thaici kizel zo hi.   

6.     TOPA PT in ii pu ii pate na zong in, na teal zo a, ei a tuu, a tuu-sawnte khang ciang, ei hong zon kul nawn ngawlin eima na ii TOPA ii zonh tu hun hi zo ta hi.

BANGTAK  ZONG TU HI ZIAM?      

1.     Pathian Ngam [The kingdom of God] le Ama ‘dikna/thutang – righteousness’  zong tu ci ciang, ii zonh tu sia Maipha hi ngawl a, Maipha hong pia thei  Maipha a nei Pa, TOPA PT ahi hi. 

2.     TOPA PT mu hi po leang, Lawkite zonh neak le dawn, silh le ten te thinngim kul ngawlin hong pia tu ahi hi [Mt 6:25]

3.     “Na zong le na mu tu uh hi,” hong ci Pa ii zong le ii mu tu hi.  TOPA Jesus in Nathaniel tungah “Philip hong sap makeak theikung nuai ah na om lai kong mu zo hi,” ci hi.  Messiah lametna taw theikung nuaiah thu ngengen Nathaniel TOPA Jesus in na mu nginge hi. Ei zong TOPA Jesus ii zong le hong mu ngawl in om thei tu ziam? 

4.     TOPA Jesus mu nuam a, theikung tung pan a ngak Zac-chae-us mu a, a inn ah tungin, “Tu ni in, hi inn ah ngupkhiakna tung hi,” ci hi.  TOPA ii zong takpi le Zac-chae-us tungah a ci bangma, “tuni nang kong ngumzo hi,” hong ci ngawl thong tu ziam [Mt 7:7; Jn 1:47, 48; Lk 19:9]?  

BANGHANG PATHIAN ZONG TU HI ZIAM?

1.     Sawltak Paul in, Athen-te tungah ii zong le, “TOPA PT ei taw ki-khuala ngawl hi” ci a, Philippi-te tungah, “TOPA ii nai ah om hi,” na ci hi [Acts 17:27; Phil 4:5NIV].

2.     Ii buaipui sia eima na PT heamkhia in ii taisan hi.  

1)    “Nuntakna anlum” nusia in  “a kisia thei an,” ii zong hi [Jn 6:48, 27].

2)    “Nuntakna tuinak” nusia in, “Mang tuineak bangin, dangcim sak thei ngawl tui” ii zong a, “a kitamh tuikuang” ii zuan hi [Re 22:17; Jn 4:14 cf. Jn 4:13; Jer 2:13].

3)    “Manpiak ngawl in tui hong ne ka po ve vun,” ci in TOPA hong samna thusim ngawlin, “an ahi ngawlte atu sum ii zangh a” innkuan, pawlpi, khua le tui sungah buaina piangsak ban ah ii khanthi lalai hi.  Minam zong ii pung thei bua hi [Isa 55:2].

3.     TOPA Jesus in, “Lawkite zonh ahi neak le dawn silh le tente taw thinngim heak ve vun, keima hong zong phot ka po ve vua, tua hile, tua nate hong ki tasam sak ba veang,” ci-in, hong zol vadel hi [Mt 6:33].

ZONG TAKPI PO LEANG II MU TU HI

1.     Ii TOPA PT se maitang-doi, nguptuam paihtuam cite om ngawl hi. 

2.     Ahihang ‘Jesus Itpa John’ bangin kinai-tuam, mealheaktuam om veve hi.  Ama a zong linglengte taw TOPA kinai zaw veve hi. 

3.     Abraham bangin PT Lawm om veve hi [Jas 2:23; Isa 41:8; 2Chro 20:7].

4.     Ama ci babang ii zui le TOPA Jesus in, “Ka lawmte” hong ci tu hi [Jn 15:14].

PATHIAN MAIPHA NGA MINAM

1.     Sawltak James in, “TOPA PT neak vun, tuahile no hong neak tu hi,” ci hi [Jas 4:8].

2.     TOPA PT in, “Na thin theampo taw Kei nong zong uh le nong mu tu uh hi,” hong ci hi [Jer 29:13].

3.     “TOPA PT in, “Hong biakpui leute kong zo tu a, ngualdang telzawk ngawl a ki-imcip thuthukte hong hilh tu veang,” hong ci hi [Jer 33:3].

4.     Sizangte in TOPA PT zong kik leang “Ih nungtolhna pan hong dam sak in,” “Sizang leitang zong hong dam sak kik tu hi!” Jer 3:22; 2Chro 7:14]

5.     Gilkial andu, dangtak tuidu bang in TOPA ii zong le ii mu tu hi [Mt 5:6].

6.     Nuntakpui po leang, ii khoaisa kii keak ii zuak zong maizum ii nga batu hi. 

7.     Sizangte sia Pathian maipha a zong minam hi ngawlin,  TOPA PT le Ama thutang zongin, ii nuntakpui le anneak, puansil, inn le lo, hauhna manna, nei le lam taw hong tuam in Pathian maipha ngate hong kici tu hi.  Ii vekpi ii tanhtu thupha TOPA in thupha hong buak ta hen! Amen. 

Pr. Suanzanang thuhilhna Sizangnet pan hi. 

Posted in: ၀ိညာဥ္ေရး