ဂျပန်သရုပ်ဖော်ရေးဆွဲသူ၊ ကာတွန်းဆရာ၊

Bonboya-zyu (奔波鸭舅)က ဂျပန်သရုပ်ဖော်ရေးဆွဲသူ၊ ကာတွန်းဆရာ၊ အရုပ်ကစားစရာတီထွင်သူဖြစ်တယ်။ သူရေးဆွဲတဲ့ Bonboya-zyuအနုပညာသရုပ်ဖော်ပုံတွေထဲက Dwarf gallery (အပုလေးအနုပညာပြခန်း)ဆိုတဲ့အတွဲတွေကို ရုပ်ပြစာအုပ်အဖြစ် ထုတ်ဝေခဲ့ပါတယ်။ လူအများရဲ့အားပေးမှုကိုရရှိခဲ့ပါတယ်။ အဲဒီနောက် သူဟာ တခြားကာတွန်းရုပ်လေးတွေလိုပဲ သူ့ရုပ်ပြစာအုပ်ထဲက ကာတွန်းရုပ်လေးတွေနဲ့ လူ့အသုံးအဆောင်ပစ္စည်းတွေပြုလုပ်ပြီး (ဥပမာ-- ဟမ်းချိန်း၊ ပို့စကတ်၊ မတ်ခွက် စတာတွေ) ရောင်းချခဲ့ပါတယ်။

  ဂျပန်မှာ အပုလေးခေတ်တစ်ခေတ်ဖြစ်ခဲ့ဖူးပါတယ်။ ဒီစာဖတ်နေတဲ့ လူတချို့မှာလည်း Bonboya-zyuရဲ့ သေးသေးညက်ညက် အရုပ်ကလေးတွေပါတဲ့ လူသုံးကုန်ပစ္စည်းတွေ ရှိကြမယ်လို့ထင်ပါတယ်။ ဖတ်မိတဲ့သူ့ကာတွန်းတွေထဲက စကားလုံးတချို့ကို ကြိုက်နှစ်သက်လို့ ဘာသာပြန်မျှဝေပါတယ်။

 (၁) တစ်ယောက်တည်းဖြစ်နေတဲ့အချိန်ကျတဲ့မျက်ရည်က တကယ့်ရင်ထဲကလာတဲ့မျက်ရည်ပါ။ မျက်ရည်တစ်စက်တိုင်းက သင့်ကိုပိုကြံ့ခိုင်စေပါတယ်။

(၂) စိတ်ရှုပ်ထွေး တွေဝေတာက ဖြစ်တတ်တဲ့သဘောပါ။
လူ့ဘဝဆိုတာ လူတိုင်းအတွက် ပထမဆုံးအကြိမ်မို့လေ။

(၃) လူသူမရှိတဲ့နေရာမှာလည်း အလှဆုံး အမွေးအတောင်တွေကို သင်ဖြန့်ထုတ်နိုင်ပါတယ်။ ဒါဟာ သင့်ရဲ့ဂုဏ်ယူစရာပေါ့။ (အရုပ်ကို ဒေါင်းရုပ်လေးဆွဲထားတယ်)

(၄) အတောက်ပဆုံးကြယ်ကို အားမကျပါနဲ့။ သင့်ကိုယ်တိုင်မှာလည်း အလင်းရှိပါတယ်။

(၅) လူတချို့က သတ္တိမရှိဘူးလို့ပြောကြတယ်။ တကယ်တော့ သတ္တိဆိုတာ မွေးရာပါမဟုတ်ဘူး။ ဒါဟာ ကြိုးစားနေရင်းကနေ ဖြစ်လာတာပါ။

(၆) တကယ့်ကံမကောင်းခြင်းဆိုတာ ညှိုးနွမ်းသွားတာမဟုတ်ဘူး။ မဖူးပွင့်ရဲဘဲ ကိုယ့်ကိုယ်ကိုစွန့်လွှတ်တာပဲဖြစ်တယ်။

(၇) တစ်ခါတလေမှာတော့ စိတ်ပျက်အားငယ်တာမျိုးရှိတာပေါ့။
ဒါပေမယ့် ငါဘယ်တော့မှ အရှုံးမပေးဘူး။

(၈) အမြဲတမ်း ရွှန်းလင်းတောက်ပချင်ပါတယ်။ ဟိုကောင်မလေးရဲ့ အပြုံးလိုပေါ့။

(၉) ငါတို့ရဲ့ဘဝက (ဒါန်းစီးသလို) ရှေ့တိုးနောက်ဆုတ် အမြဲလွှဲနေတာပေါ့။
ဒီထက်ပိုမြင့်အောင်လွှဲနိုင်ဖို့ တစ်ခါတလေမှာ အရင်နောက်ဆုတ်ရတယ်။

(၁ဝ) ခလုတ်တိုက်လဲကျတာက မဖြစ်စလောက်လေးပါ။
ဒါဟာ သင် ရှေ့ဆက်လျှောက်လှမ်းနေသေးလို့ပါပဲ။
---
နိုင်းနိုင်းစနေ (July. 14. 2015)

Posted in: စိတ်ဓာတ်ခွန်အား